Con motivo da celebración do Día Mundial do Alzhéimer, Renfe colabora coa Federación Alzhéimer Galicia (FAGAL) na difusión do seu proxecto ‘#Sentir dá memoria’, nos trens de Servizo Público de Galicia e nas principais estacións da rexión.

 

O Día Mundial do Alzhéimer celébrase o 21 de setembro, e Renfe activa a campaña de difusión e sensibilización en colaboración con FAGAL desde esta semana, estendéndoa ata final de setembro. Os trens de Servizo Público do Eixo Atlántico Vigo-Santiago-A Coruña, e os do corredor Avant Ourense-Santiago-A Coruña levarán nos repousacabezas a información do proxecto ‘#Sentir dá memoria’. Renfe tamén colocará carteis informativos nas once principais estacións de Galicia.

 

Con ‘Os sentidos da memoria’, FAGAL busca destacar o papel da estimulación sensorial a través de actividades culturais como terapia complementaria para o tratamento da enfermidade de Alzhéimer, xa que esta estimulación desencadea recordos, emocións e respostas motoras en persoas con demencia. O proxecto aborda esa activación dos sentidos a través de actividades gastronómicas, coa elaboración de 27 receitas tradicionais deseñadas e preparadas en conxunto por persoas con demencia e cociñeiros de renome de Galicia que serán envorcadas nun receitario solidario.

Esta colaboración entre Renfe e FAGAL enmárcase no proxecto de responsabilidade social empresarial ‘Semanas Responsables’ que se desenvolve desde a Xerencia de Área de Servizo Público de Renfe en Galicia para dar visibilidade a aquelas accións comprometidas coa responsabilidade social, o coidado do medioambiente, a igualdade, a cultura, a ética e/o a transparencia