Aberto prazo de inscrición para participar nos Talleres Divulgamente
Este ano poderán participar centros educativos de Ferrol, Vigo e Carballo
Divulgamente é un proxecto de sensibilización interxeracional, impulsado pola Fundación Barrié e a Federación Alzhéimer Galicia, que ten como obxectivo mostrar dunha maneira próxima e dinámica que son as demencias, como afectan o cerebro e as diferentes demencias existentes, achegando aos máis novos a realidade desta doenza que afecta en Galicia a preto de 70.000 persoas.
A quen se dirixe?
A estudantes de Bacharelato e de FP da rama sociosanitaria das localidades de Vigo, Carballo e Ferrol.
Actividades incluídas en cada taller
1ª Charla divulgativa en formato en liña “Coñecer mellor o Alzhéimer”, impartida polo Doutor en Neurobiología e Investigador, Carlos Spuch, quen explicará, de forma dinámica e contextualizada na actual situación sanitaria e social, que son as demencias, por que se producen e cal é a diferenza entre os distintos tipos de demencias, entre outros temas.
2ª Xornada de sensibilización na aula na que profesionais da asociación de referencia na localidade acoden ao centro educativo a explicar as actividades, terapias e protocolos que se realizan desde as asociacións para atrasar o avance da enfermidade e mellorar a calidade de vida das persoas con alzhéimer e as súas familias (no caso de non ser posible a realización presencial da actividade por circunstancias sanitarias, realizaríase en formato en liña).
3ª Na última actividade, o alumnado fará unha visita a un centro de día de Alzhéimer que lles permitirá ver e coñecer un centro especializado en demencias e as actividades que se realizan no mesmo, sendo partícipes das mesmas durante a visita (no caso de non ser posible a realización presencial da actividade por circunstancias sanitarias, realizaríase en formato en liña).
A selección dos centros educativos participantes nos talleres realizarase por orde de inscrición a través do formulario habilitado nesta páxina. No caso de que o número de solicitudes supere ao número de prazas dispoñibles, estas seleccionaranse conforme ao criterio da Federación Alzhéimer Galicia.